In 2024 het StudentePlein ’n grensverskuiwende stap geneem om Afrikaanse studente akademies te bemagtig te midde van die toenemende verengelsing van universiteitsleermateriaal. Die bekendstelling van LeerPleinKI – ’n eerste-van-sy-soort, Afrikaanstalige kunsmatige intelligensie-platform – is besig om die manier waarop studente leer, vir altyd te verander.

LeerPleinKI is ’n KI-platform wat studente toelaat om in Afrikaans te leer, selfs wanneer hul studiemateriaal slegs in Engels beskikbaar is. Die platform gebruik gevorderde tegnologie om Engelse data (notas, handboeke, vraestelle en so meer) te interpreteer en beantwoord dan vrae, in Afrikaans, met verwysing na dié data. Dit is ’n manier om studente voortdurend toegang te gee tot Afrikaanstalige akademiese ondersteuning, ongeag die oorspronklike taal van die inhoud.

Die tegnologie agter LeerPleinKI sluit drie hoofkomponente in: ’n vektordatabasis van Engelse studiemateriaal, semantiese soekfunksies om relevante inhoud te vind en ’n gevorderde taalmodel wat antwoorde formuleer in konteks – in Afrikaans.

Anders as generiese KI-instrumente, soos ChatGPT, put LeerPleinKI uitsluitlik uit studiemateriaal wat StudentePlein self geïndekseer het. Dit verseker inhoudelike toepaslikheid, akademiese gehalte en ’n Afrikaansvriendelike omgewing. Antwoorde word slegs in Afrikaans verskaf, wat gebruik daarvan tot Afrikaanse studente beperk.

Die realiteit is dat Afrikaanse studente toenemend in Engels moet studeer, selfs aan instellings wat hulleself as Afrikaans beskryf. Hierdie tendens lei daartoe dat afgestudeerdes dikwels onseker voel in Afrikaanse werksomgewings. LeerPleinKI bied ’n koste-effektiewe en skaalbare oplossing wat studente in staat stel om hul studies sinvol in hul moedertaal te verwerk – sonder dat nuwe vertalings of handboeke geskep hoef te word.

Die platform is ontwerp vir gebruikers regoor verskeie fakulteite – van Geneeskunde tot Regsgeleerdheid, waar Afrikaanse materiaal al vir jare afwesig is. ’n Student kan eenvoudig ’n module kies, byvoorbeeld Strafreg Praktyk, en dan in Afrikaans vrae stel oor die inhoud. Die platform gee binne sekondes antwoorde terug, met verwysing na die oorspronklike Engelse bronmateriaal.

LeerPleinKI is tans in ’n toetsfase beskikbaar vir ’n kleiner groep studente, maar die grootskaalse uitrol is reeds in beplanning. StudentePlein beskou die projek nie bloot as ’n hulpmiddel nie, maar as deel van ’n breër beweging: om tegnologie in diens van taal te plaas, en taal in diens van leer. Dit is ’n kreatiewe en tegnologies gevorderde wyse om verengelsing in ’n bate vir Afrikaanse studente te omskep.

Vir die eerste keer in bykans ’n dekade sal studente weer in Afrikaans kan leer – ongeag die taal van die handboek.

Indien jy deel van die toetsfase van LeerPlein-KI wil wees, kontak ons via admin@studenteplein.co.za